Sinabi ni CZ, ang co-founder ng Binance, na medyo nagulat siya nang makatanggap ng pardon mula kay Pangulong Trump ng United States, at itinanggi rin niya na mayroon siyang ugnayang pang-negosyo sa pamilyang Trump sa isang panayam.
Sinabi ni CZ sa Fox News na kailanman ay hindi niya personal na nakatagpo o nakausap si Trump bago o matapos makatanggap ng presidential pardon noong Oktubre. Minsan pa lamang daw niyang nakatagpo ang anak ni Trump na si Eric sa Bitcoin Middle East and North Africa conference sa Abu Dhabi, United Arab Emirates.
“Walang ugnayang pang-negosyo sa pagitan ko, ng Binance, at ng World Liberty Finance,” ani CZ. Idinagdag pa niya na wala siyang alam sa status ng kanyang pardon habang nasa proseso pa ito:
“Hindi ko alam kung kailan o kung mangyayari nga ba ito. Sa pagkakaalam ko, isinumite ng aking mga abogado ang petisyon noong Abril, at inabot ito ng ilang buwan. Hindi ko alam ang takbo nito. Walang anumang pahiwatig kung gaano na ito kalayo, at iba pa. Pagkatapos, nangyari na lang ito isang araw.”
Nagdulot ng iba’t ibang reaksyon ang nasabing pardon. Ipinagdiwang ito ng crypto community bilang tagumpay para sa industriya at pagbaligtad sa mga polisiya ng administrasyong Biden na laban sa crypto. Sa kabilang banda, bumatikos naman ang mga mambabatas mula sa Democratic party at inakusahan si Trump ng politikal na korapsyon.
Nagdulot ng kontrobersya at mga akusasyon ng pay-to-play ang pardon ni CZ
Sa isang press conference matapos ang pardon, sinabi ni Trump na hindi niya personal na kilala CZ, ngunit napayuhan siya na ang kaso laban dito ay may halong politika.
“Marami siyang suporta, at sinabi nila na ang ginawa niya ay hindi man lang isang krimen, hindi iyon krimen. Siya ay pinag-initan ng administrasyong Biden,” ani Trump.
Inakusahan naman ni Democratic Rep. Maxine Waters si Trump ng pagpasok sa isang “pay-to-play” na kasunduan, kung saan binigyan di umano ng pardon si CZ kapalit ng mga investment sa crypto sa mga proyekto at platform na konektado sa pamilyang Trump, kabilang ang World Liberty Financial (WLFI).
Ang mga alegasyong ito ay nagtulak sa ilang mambabatas ng Democratic party, kabilang sina Senator Elizabeth Warren ng Massachusetts at Senator Bernie Sanders ng Vermont, na sumulat ng isang bukas na liham para kay Attorney General Pam Bondi upang busisiin si Trump at ang nasabing pardon.
