Dinepensahan ni US President Donald Trump ang kanyang pag-pardon sa co-founder ng Binance na si Changpeng “CZ” Zhao, habang iginigiit na hindi niya personal na kilala ang crypto executive at minaliit ang mga kritisismo na ang hakbang na ito ay may bahid ng politika.
Sa isang panayam sa 60 Minutes ng CBS News, iginiit ni Trump na hindi niya kilala si CZ, isang pag-uulit sa kanyang mga naunang pahayag matapos niyang magbigay ng pardon noong huling bahagi ng Oktubre.
“OK, handa na ba kayo? Hindi ko alam kung sino siya,” sagot ni Trump nang tanungin tungkol sa pardon sa nasabing panayam, at idinagdag na nabalitaan niyang ang kaso ni CZ ay isang “Biden witch hunt.”
Ang mga pahayag na ito ni Trump tungkol sa dating CEO ng Binance — na umamin sa pagpapadali ng money laundering noong 2023 — ay kasunod ng sunud-sunod na alegasyon ng posibleng conflict of interest dahil sa ugnayan ng Binance sa mga crypto venture na may kinalaman sa pamilya Trump.
Isang mainit na "pay-for-play"
Nang ginigipit ni CBS anchor Norah O’Donnell tungkol sa mga ulat na tumulong ang Binance sa pagproseso ng isang $2 billion stablecoin purchase na may kaugnayan sa World Liberty Financial (WLFI), ang proyektong suportado ni Trump, bago ang pag-pardon, binalewala lang ni Trump ang suhestyong ito.
“Ganito kasi ‘yan, wala akong alam tungkol diyan dahil sobrang busy ko sa ibang mga bagay,” ani ng pangulo.
Matapos sumingit ni O’Donnell at sabihing, “Pero nabigyan siya ng pardon,” sumagot si Trump:
“Norah, ito lang ang masasabi ko sa iyo — ang mga anak ko ang nakatutok diyan. At masaya ako para sa kanila, dahil mukhang magandang industriya ang crypto. Tingin ko ay mabuti ito. Alam mo, nagpapatakbo sila ng negosyo; wala sila sa gobyerno [...] Proud ako sa kanila, [pero] nakatutok ako dito.”
“Wala akong alam tungkol sa taong iyon, maliban sa nababalitaan ko na biktima siya ng weaponization ng gobyerno,” sabi ni Trump tungkol kay CZ, na tumutukoy sa tinawag niyang corrupt na gobyerno sa ilalim ng administrasyong Biden.
“Isa lang ang mahalaga sa akin,” patuloy ni Trump, habang sinasabing gusto niyang “gawing dakila ang crypto para sa Amerika,” at idinagdag pa:
“Ang crypto ay naging isang napakalaking industriya, kung ganoon mo man ito gustong tawagin. At buong pagmamalaki kong sinasabi na malayo na ang narating natin kumpara sa China at sa iba pang bansa. At ang China ay seryosong pumapasok na rin dito ngayon.”
“Kung gagamitin mo ang kapangyarihan para gipitin ang mga tao, papatayin mo ang industriyang iyan, at iyon ay napakasama,” pagtatapos ng pangulo.
