Ayon kay Balaji Srinivasan, isang dating executive sa crypto exchange na Coinbase at may-akda ng aklat na “The Network State,” ang tradisyonal na ekonomiya ay unti-unti nang tinatanggal sa mga advanced na bansa. Ito ay dahil lumilipat na sila sa isang ekonomiyang inuuna ang Internet na pinangungunahan ng industriya ng teknolohiya at mga digital platform.
"Ang dating ekonomiya ay nilulubog pabor sa ekonomiya ng Internet," sabi ni Srinivasan sa isang post niya sa X noong Setyembre 20.
Nagbahagi siya ng isang chart na nagpapakita ng pagkakaiba sa presyo sa pagitan ng tinatawag na “Magnificent Seven” na mga tech stock — na nakakaranas ng napakabilis na paglago, at ng natitirang mga kompanya sa S&P 500 index. Ayon sa chart, ang presyo ng mga kompanyang ito sa S&P 500 ay nanatiling halos walang pagbabago mula pa noong 2005.
Ang S&P 500, na itinuturing na pangunahing batayan ng ekonomiya, ay isang weighted stock market index ng 500 pinakamalaking kompanya batay sa market capitalization na nakalista sa stock market ng Estados Unidos. Sinabi ni Srinivasan:
“Mula noong 2008 financial crisis, bawat transaksyon at bawat komunikasyon ay lumipat na online. Ngunit, tayo ay nasa paanan pa lamang ng bundok. Ang susunod na hakbang ay ang ekonomiya, komunidad, lungsod, at pamumuno na pawang nakabatay sa Internet. Ang mundo ay unti-unti nang nagiging "Internet-First.”
Ang Magnificent Seven ay kinabibilangan ng mga dambuhalang kompanya ng consumer tech na Apple at Microsoft, ang online marketplace na Amazon, ang parent company ng Google, ang kompanya ng social media at augmented reality na Meta Platforms, ang tagagawa ng high-performance computer chip na Nvidia, at ang gumagawa ng electric car na Tesla.
Si Srinivasan ang nagpasikat sa konsepto ng Network States, mga online community na nakakalat at naniniwala siyang papalit balang araw sa mga tradisyonal na mga bansa.
Ang mga network states na ito ay mangangailangan ng internet-native money sa anyo ng cryptocurrencies. Ayon sa kanya, ito ay kumakatawan sa isang mahalagang pagbabago sa kasaysayan ng tao, katulad ng paglipat mula sa ekonomiyang pang-agrikultura patungo sa ekonomiyang pang-manupaktura noong Industrial Revolution.
Kaugnay: Hindi Web 3.0 ang Crypto, ito ay Kapitalismo 2.0 — Crypto exec
Palabas ang luma, papasok ang bago: Blockchain at AI, binabago ang dating sistema
Ang dating sistema ng pananalapi at ang mga gobyerno ng estado ay karaniwang mabagal sa pagtanggap ng mga bagong teknolohiya, at madalas pa ngang sumasakal sa mga inobasyong teknolohikal.
Gayunpaman, kasalukuyan namang itinutulak ng mga regulator at mambabatas sa Estados Unidos ang pag-aaral, pagpapaunlad, at pag-i-integrate ng artificial intelligence at teknolohiya ng blockchain upang baguhin at gawing moderno ang sistema ng pananalapi.
Naglabas ng pinagsamang pahayag ang US Securities and Exchange Commission (SEC) at ang Commodity Futures Trading Commission (CFTC) noong Setyembre, na nagpapahiwatig ng paglipat sa mga 24/7 na capital market. Ang layunin nito ay para mapantayan ng dating sistema ng pananalapi ang bilis at pagiging bukas ng crypto trading, na bukas sa buong araw at linggo.
Bukod pa rito, kinuha rin ng gobyerno ng U.S. ang mga oracle provider na Pyth Network at Chainlink para ilathala ang datos ng ekonomiya ng gobyerno onchain. Ginawa ito para madagdagan ang transparency sa budget at accountability sa publiko.